काठमाडौँ, साउन ८ — उपप्रधानमन्त्री तथा सहरी विकासमन्त्री प्रकाशमान सिंहले गीत र सङ्गीतलाई समाज रूपान्तरणको सशक्त माध्यमको रूपमा व्याख्या गरेका छन्। बिहीबार काठमाडौँमा आयोजित गीतकार देवी पराजुलीका गीत विमोचन कार्यक्रममा बोल्दै उनले साङ्गीतिक प्रतिभाहरूको हौसला बढाउन सक्दो सहयोग गर्नुपर्ने धारणा व्यक्त गरे।
"प्रतिभावान व्यक्तिहरूलाई सघाउँदा उनीहरूको मनोबल उच्च हुन्छ," उपप्रधानमन्त्री सिंहले भने, "गीत–सङ्गीतले समाजका यथार्थलाई प्रभावकारी रूपमा प्रस्तुत गर्न सक्ने क्षमता राख्छ।"
आफू स्वयं सङ्गीतप्रेमी रहेको उल्लेख गर्दै उनले संवैधानिक रूपमा प्राप्त सांस्कृतिक अभिव्यक्तिका अधिकारहरू कार्यान्वयन गर्न हरसम्भव सहयोग गर्ने प्रतिबद्धता पनि जनाए। साथै, संविधानमा समेटिएका मूल्य र मान्यतालाई व्यवहारमा उतार्न सबैको सक्रिय भूमिका आवश्यक रहेको उनले बताए।
