काठमाडौं, १७ वैशाख । नेपाली कांग्रेसका निवर्तमान सभापति शेरबहादुर देउवा समूहको तीन दिने भेला ११ बुँदे निर्णय गर्दै सम्पन्न भएको छ। महाराजगञ्जस्थित स्मार्ट होटलमा बुधबारदेखि सुरु भएको छलफल बिहीबार औपचारिक रूपमा टुंगिएको हो।
भेलाले पार्टीको वर्तमान राजनीतिक परिस्थिति, आन्तरिक विवाद तथा आगामी रणनीतिलाई केन्द्रमा राख्दै ११ बुँदे निष्कर्ष सार्वजनिक गरेको छ।
निवर्तमान कार्यवाहक सभापति पूर्णबहादुर खड्काले जारी गरेको विज्ञप्तिमा कांग्रेस विशेष महाधिवेशन र नियमित महाधिवेशनबीचको विवादका कारण पार्टीले निर्वाचनमा गम्भीर क्षति व्यहोर्नुपरेको उल्लेख गरिएको छ।
विज्ञप्तिमा भनिएको छ, “पार्टीको १५औँ नियमित महाधिवेशन वा विशेष महाधिवेशन भन्ने विषयले निर्वाचनको पूर्वसन्ध्यामा कांग्रेसलाई विवादको भुमरीमा पुर्यायो, जसका कारण ऐतिहासिक क्षति भयो।”
भेलामा सहभागी नेताहरूले आगामी दिनमा पार्टीलाई एकताबद्ध गर्दै संगठन सुदृढीकरणमा ध्यान दिनुपर्नेमा जोड दिएका छन्। साथै, आन्तरिक विवादलाई व्यवस्थापन गर्दै निर्वाचनमुखी तयारीमा केन्द्रित हुनुपर्ने निष्कर्ष निकालिएको छ।
तीन दिनसम्म चलेको छलफलपछि सार्वजनिक गरिएको निर्णयले कांग्रेसभित्रको आन्तरिक शक्ति सन्तुलन र आगामी महाधिवेशनको दिशाबारे नयाँ बहस सुरु हुने अपेक्षा गरिएको छ।
