२७ वैशाख, कास्की । पोखरामा जग्गा धितो राखेर किर्ते कागजातमार्फत ५० लाख रुपैयाँ ऋण निकालेको आरोपमा प्रहरीले दुई जनालाई पक्राउ गरेको छ ।
पक्राउ पर्नेमा पोखरा महानगरपालिका–३० ढुङ्गेपाटनकी ४४ वर्षीया वन्ती शाही र सुर्खेतको चौकुने गाउँपालिका घर भई हाल पोखरा–१० बुद्धचोक बस्दै आएका ४४ वर्षीय भद्र थापा रहेका छन् ।
प्रहरीका अनुसार मोहनबहादुर शाहीको नाममा रहेको कित्ता नम्बर २४४४ र २४४७ को जग्गा धितो राख्न उनका हस्ताक्षर र सहीछाप किर्ते गरिएको थियो । उक्त कागजातका आधारमा सिद्धार्थ बैंकको तालचोक शाखाबाट ५० लाख रुपैयाँ ऋण निकालिएको बताइएको छ ।
घटनाबारे जाहेरी परेपछि इलाका प्रहरी कार्यालय शिशुवाबाट खटिएको टोलीले वैशाख २५ गते दुवै जनालाई पक्राउ गरेको जिल्ला प्रहरी कार्यालय कास्कीका सूचना अधिकारी प्रहरी नायव उपरीक्षक हरिबहादुर बस्नेतले जानकारी दिए ।
पक्राउ परेकामाथि ठगी, आपराधिक विश्वासघात तथा आपराधिक लाभसम्बन्धी कसूरमा अनुसन्धान अघि बढाइएको छ । कास्की जिल्ला अदालतबाट पाँच दिनको म्याद थप गरी थप अनुसन्धान भइरहेको प्रहरीले जनाएको छ ।
