काठमाडौं । पूर्वप्रधानन्यायाधीश चोलेन्द्रशम्शेर जबरालाई प्रहरीले नियन्त्रणमा लिएर केही समयपछि छाडेको विषयलाई लिएर प्रतिनिधिसभामा प्रश्न उठेको छ ।
नेपाली कम्युनिस्ट पार्टीका प्रमुख सचेतक युवराज दुलाल, एमालेका प्रमुख सचेतक ऐनबहादुर महर र श्रम संस्कृति पार्टीका सांसद ध्रुवराज राईले जबरालाई नियन्त्रणमा लिएको घटनाबारे सरकारसँग जवाफ मागेका हुन् ।
प्रमुख सचेतक दुलालले जबरालाई पक्राउ पुर्जी र स्पष्ट कारणबिना नियन्त्रणमा लिइएको भन्दै प्रश्न उठाए । उनले सरकार कानुनी राज्यको बाटोमा अघि बढिरहेको छ कि गैरकानुनी अभ्यासतर्फ भन्ने प्रश्नसमेत गरे ।
एमालेका प्रमुख सचेतक महरले पनि जबरालाई नियन्त्रणमा लिने तरिका आपत्तिजनक भएको भन्दै सरकारको कार्यशैलीमाथि प्रश्न उठाए ।
श्रम संस्कृति पार्टीका सांसद ध्रुवराज राईले भने जबरासँगै राजनीतिक विश्लेषक तथा लेखक भरत दाहालको पक्राउको विषय पनि संसद्मा उठाए । उनले दुवै घटनाबारे प्रधानमन्त्री बालेन शाहले संसद्मा आएर स्पष्ट जवाफ दिनुपर्ने माग गरे ।
सरकारले केही दिनअघि भरत दाहाललाई पक्राउ गरेको थियो । त्यसपछि सर्वोच्च अदालतका न्यायाधीश कुमार रेग्मीको इजलासले दाहाल पक्राउको लिखित कारण पेस गर्न आदेश दिएको स्रोतमा उल्लेख छ ।
यसैबीच जबरालाई शनिबार राति घरबाट नियन्त्रणमा लिएर दिउँसो छाडिएको बताइएको छ । उनलाई कुन कसुर वा आधारमा नियन्त्रणमा लिइएको हो भन्नेबारे सम्बन्धित सरकारी निकायबाट स्पष्ट जानकारी सार्वजनिक नभएको सांसदहरूले बताएका छन् ।
सांसद राईले सरकारको कार्यशैलीबारे प्रश्न गर्दै गम्भीर विषय भए त्यसलाई गम्भीरतापूर्वक सम्बोधन गर्नुपर्ने बताएका छन् ।
