काठमाडौं, १० फागुन - नेपाली बजारमा आइतबार सुनको मूल्यमा उल्लेखनीय वृद्धि भएको छ। नेपाल सुनचाँदी व्यवसायी महासंघ ले तोकेको नयाँ दरअनुसार सुन प्रतितोला ५ हजार ६ सय रुपैयाँले बढेर ३ लाख १० हजार ३ सय रुपैयाँ कायम भएको छ। अघिल्लो दिन सुन ३ लाख ४ हजार ७ सय रुपैयाँमा कारोबार भएको थियो।
यसअघि माघ १५ गते सुनको मूल्य हालसम्मकै उच्च ३ लाख ३९ हजार रुपैयाँ प्रतितोला पुगेको रेकर्ड कायम भएको थियो।
त्यसैगरी, चाँदीको मूल्यमा पनि वृद्धि देखिएको छ। अघिल्लो दिन ५ हजार ५० रुपैयाँ प्रतितोला रहेको चाँदी आइतबार ३७५ रुपैयाँले बढेर ५ हजार ४२५ रुपैयाँ पुगेको छ। चाँदीले पनि माघ १५ गते ७ हजार ५०५ रुपैयाँ प्रतितोला पुगेर ऐतिहासिक कीर्तिमान बनाएको थियो।
बजारमा सुन–चाँदीको मूल्यमा देखिएको यो उतारचढावले लगानीकर्ता तथा उपभोक्तामा चासो बढाएको छ।
