काठमाडौं - नेपाली बजारमा सुनचाँदीको मूल्यले आज फेरि नयाँ कीर्तिमान बनाएको छ। एकैदिन सुनको मूल्य तोलामा ९ हजार ५ सय रुपैयाँले वृद्धि भई हालसम्मकै उच्च विन्दुमा पुगेको हो।
नेपाल सुनचाँदी व्यवसायी महासङ्घका अनुसार आज एक तोला सुनको मूल्य ३ लाख १८ हजार ८०० रुपैयाँ कायम भएको छ। यस्तै, चाँदीको मूल्य पनि ४३० रुपैयाँले बढेर तोलाको ७ हजार ३०० रुपैयाँमा कारोबार भइरहेको छ।
यसअघि मङ्गलबार सुन तोलाको ३ लाख ९ हजार ३०० रुपैयाँ र चाँदी ६ हजार ८७० रुपैयाँमा कारोबार भएको थियो।
अन्तर्राष्ट्रिय सञ्चारमाध्यमहरूका अनुसार विश्व बजारमा पनि बहुमूल्य धातुको मूल्य उकालो लागेको छ। आज अन्तर्राष्ट्रिय बजारमा एक औँस सुन ५ हजार २०० अमेरिकी डलरमा कारोबार भइरहेको छ भने त्यही परिमाणको चाँदीको मूल्य १११ अमेरिकी डलर पुगेको छ।
