काठमाडौं, २४ फागुन - नेपाली कांग्रेसका नेता गगन थापाले सर्लाही क्षेत्र नम्बर ४ बाट निर्वाचित अमरेशकुमार सिंहलाई बधाई दिएका छन्। निर्वाचनमा आफू पराजित भएपछि उनले विजयी सिंहलाई शुभकामना दिएका हुन्।
सामाजिक सञ्जालमार्फत प्रतिक्रिया दिँदै थापाले सर्लाही-४ बाट निर्वाचित भएकोमा अमरेशकुमार सिंहलाई हार्दिक बधाई तथा सफल कार्यकालको शुभकामना व्यक्त गरेका छन्।
यसका साथै उनले आफूलाई विश्वास गर्दै मत दिएका सबै मतदाताप्रति आभार प्रकट गरेका छन्। मतदाताले देखाएको विश्वास र समर्थनका लागि उनले कृतज्ञता व्यक्त गरेका हुन्।
थापाले सर्लाही-४ क्षेत्रमा आफूले देखेका विभिन्न समस्या समाधानका लागि आफ्नो तर्फबाट निरन्तर पहल गर्ने प्रतिबद्धता समेत जनाएका छन्। आफ्नो क्षमता र जिम्मेवारीभित्र रहेर क्षेत्रको विकास तथा समस्याको सम्बोधनका लागि निरन्तर काम गरिरहने उनले बताएका छन्।
