१४ भन्दा बढी केन्द्रमा सय मिलिमिटरभन्दा बढी वर्षा मापन भएको छ।
गण्डकोट केन्द्रमा १२६.८, अर्घाखाँची केन्द्रमा १२५.४, सिमलपानीमा ११६, कुमालगाउँ केन्द्रमा ११५.६, चापाकोट केन्द्रमा १०९.६, अत्रौलीटारमा ११७, देउराली नवलपुरमा ११५.६, दुम्कीबासमा ११४.८, मेघौलीमा १०२.६ मिलिमिटर वर्षा भएको छ।
काठमाडौंमा लगातार सिमसिमे झरी परिरहेको छ। लगातारको झरीका कारण काठमाडौं उपत्यकाको बागमती जलाधारअन्तर्गतका नदी, खोलाको सतह बढेका छन्।
बागमती, मनोहरा लगायत कतिपय नदीको सतह सतर्कता तह आसपास पुग्न लागेपछि प्रशासनले सतर्क गराएको छ।
काठमाडौं उपत्यकामा सबैभन्दा बढी बूढानीलकण्डमा ८८ मिलिमिटर वर्षा भएको छ।
मौसमविद् विनोद पोखरेलले काठमाडौंमा शनिबारसम्म लगातार झरी पर्ने सम्भावना व्यक्त गरेका छन्।
‘काठमाडौंमा भोलिसम्म लगातार वर्षा छ। भोलि अझै ठूलो वर्षाको सम्भावना छ,’ उनले सिधाकुरासँग भने।
उनले अझै दुई दिन वर्षाको गतिविधि बढ्ने पनि जानकारी दिए। देशको पश्चिमी भूभागमा दुई सय मिलिमिटरसम्म वर्षाको सम्भावना रहेको औंल्याए।
