१२ माघ, काठमाडौं - नेपाली बजारमा सुनको मूल्यले इतिहासकै उच्च विन्दु छोएको छ। नेपाल सुनचाँदी व्यवसायी महासंघका अनुसार सोमबार छापावाल सुनको मूल्य प्रतितोला ५ हजार २ सय रुपैयाँले वृद्धि हुँदै ३ लाख ९ हजार रुपैयाँ पुगेको हो, जुन हालसम्मकै सर्वाधिक दर हो।
यसअघि आइतबार सुन प्रतितोला ३ लाख ३ हजार ८ सय रुपैयाँमा कारोबार भएको थियो। शुक्रबारको तुलनामा आइतबार मात्रै सुनको मूल्य २ हजार ४ सय रुपैयाँले बढेको थियो।
गत शुक्रबार सुनको भाउ प्रतितोला ३ लाख १ हजार ४ सय रुपैयाँमा पुगेको थियो भने त्यसअघिल्लो दिन बिहीबार तोलाको २ लाख ९२ हजार २ सय रुपैयाँ थियो। शुक्रबार एकैदिन सुनको मूल्य प्रतितोला ९ हजार २ सय रुपैयाँले उकालो लागेको थियो।
यससँगै चाँदीको मूल्य पनि वृद्धि भएको छ। सोमबार चाँदी प्रतितोला ६ हजार ७ सय ६५ रुपैयाँमा कारोबार भइरहेको छ। आइतबार चाँदीको मूल्य ६ हजार ४ सय ८० रुपैयाँ थियो भने शुक्रबार प्रतितोला ६ हजार १ सय ९० रुपैयाँ कायम रहेको थियो।
