सिरहा - सिरहा नगरपालिकाका नगर प्रमुखविरुद्ध जारी आन्दोलन हालका लागि स्थगित गरिएको छ। आन्दोलनका कारण स्थानीय सेवामा असहजता बढेपछि आन्दोलनरत पक्षले तत्कालका लागि कार्यक्रम स्थगित गर्ने निर्णय गरेको हो।
नगर प्रमुख डा. नवीनकुमार यादवले स्वास्थ्य शाखामा कार्यरत कर्मचारी रामशरण यादवमाथि कुटपिट गरेको आरोपपछि कर्मचारीहरू आन्दोलित बनेका थिए। आन्दोलनका कारण नगरपालिकाबाट प्रदान गरिने नियमित सेवासमेत प्रभावित भएको थियो।
स्थिति असहज बन्दै गएपछि सिरहाका प्रमुख जिल्ला अधिकारीले आन्दोलन स्थगित गरी नियमित काममा फर्कन आग्रह गरेका थिए। सोही अनुसार आन्दोलनरत पक्षले शान्ति सुरक्षाको अवस्थालाई मध्यनजर गर्दै आन्दोलनका सबै कार्यक्रम हाललाई रोक्ने निर्णय गरेको हो।
तर, आन्दोलन पूर्ण रूपमा समाप्त नभएको आन्दोलनकारीहरूले स्पष्ट पारेका छन्। उनीहरूले पीडित रामशरण यादवलाई न्याय नपाएसम्म र दोषीमाथि कानुनी कारबाही नभएसम्म संघर्ष जारी रहने चेतावनी दिएका छन्।
