१९ भदौ, बुटवल — लुम्बिनी प्रदेश पछिल्ला दिनमा प्राकृतिक तथा मानवजन्य विपद्को कहालिलाग्दो चपेटामा परेको छ। साउन महिनाको मात्र एक महिनाको अवधिमा विभिन्न ३३५ विपद् घटनाले ४३ जनाको ज्यान लिएको छ भने १५४ जना घाइते भएका छन्। दुई जना अझै बेपत्ता छन्।
प्रदेश आपतकालीन कार्यसञ्चालन केन्द्रले सार्वजनिक गरेको विवरण अनुसार बाढी, डुबान, अतिवृष्टि, पहिरो, चट्याङ, आगलागी, विषालु पदार्थ सेवन, सर्पदंश र जनावर आक्रमणजस्ता घटनाले यो मानवीय क्षति निम्त्याएको हो। डुबेर मृत्यु हुनेको संख्या मात्रै २७ पुगेको छ भने सर्पदंशका कारण ८ जनाले ज्यान गुमाएका छन्।
मृत्युको हिसाबले सबैभन्दा बढी क्षति कपिलवस्तुमा भएको छ, जहाँ ९ जनाले ज्यान गुमाएका छन्। दाङमा ७, रूपन्देहीमा ५, रोल्पा र प्यूठानमा ४–४, बर्दिया, बाँके, गुल्मी, पाल्पा, अर्घाखाँची र नवलपरासी पश्चिममा २–२, रुकुम पूर्वमा १ जनाको मृत्यु भएको छ।
यस एक महिनाको अवधिमा करिब ५१ लाख रुपैयाँ बराबरको भौतिक क्षति भएको केन्द्रको अनुमान छ। २१ वटा निजी घर पूर्णरूपमा ध्वस्त भएका छन् भने १२ घरमा आंशिक क्षति पुगेको छ। साथै, एक सरकारी भवन पूर्ण रूपमा नष्ट भएको छ भने दुई सरकारी भवन आंशिक रूपमा प्रभावित छन्। ३० पशु चौपाया र २० गोठ पनि नष्ट भएका छन्।
विपद् व्यवस्थापन र उद्धारलाई प्रभावकारी बनाउने उद्देश्यले लुम्बिनी प्रदेश सरकारअन्तर्गतको आन्तरिक मामिला तथा कानून मन्त्रालयले स्थानीय तह, सुरक्षा निकाय र समुदायसँगको समन्वयलाई थप सशक्त बनाउन रणनीति अघि सारेको छ।
वर्षा यामसँगै प्राकृतिक जोखिमहरू अझै बढ्न सक्ने आँकलन भइरहेका बेला, अबको चुनौती मात्र राहत वितरण नभई दीर्घकालीन जोखिम न्यूनीकरण र विपद्-पूर्व तयारीलाई बलियो बनाउनु हो।
