काठमाडौं - कलाकार सागर लम्साल ‘बले’माथि एक युवतीले गम्भीर आरोप लगाएकी छन्, जसले सामाजिक सञ्जालमा व्यापक चर्चा उत्पन्न गरेको छ।
अमेरिकामा बस्दै आएकी ती युवतीले सामाजिक सञ्जालमार्फत सार्वजनिक गरेको विवरणमा, एक वर्षअघि बले अमेरिका पुगेका बेला आफ्नै अपार्टमेन्टमा आफूविरुद्ध जबर्जस्ती सम्बन्ध राखिएको दाबी गरेकी छन्।
उनले आफू लामो समयदेखि मानसिक स्वास्थ्य समस्या—डिप्रेसन र एन्जाइटीसँग जुधिरहेको अवस्थामा विश्वास गरेका व्यक्तिबाटै यस्तो घटना घटेको उल्लेख गरेकी छन्। युवतीका अनुसार, लामो समयदेखि चिनजान र दाइसरह मान्दै आएको व्यक्तिलाई विश्वास गरेर आफ्नो बसोबासस्थल देखाउन लगेपछि उक्त घटना भएको हो।
पीडितले आफ्नो अनुभव सार्वजनिक गर्दै आफूले अत्यन्त विश्वास गरेको व्यक्तिबाट धोका पाएको भन्दै गहिरो पीडा व्यक्त गरेकी छन्। परिवारमा असर पर्ने डरका कारण तत्काल घटना सार्वजनिक गर्न नसकेको पनि उनले बताएकी छन्।
उक्त आरोपपछि सामाजिक सञ्जालमा मिश्रित प्रतिक्रिया देखिएको छ। युवती फिल्मकर्मी परिवारसँग सम्बन्धित र स्वयं पनि कलाकार भएको बताइएको छ। उनलाई नजिकबाट चिन्ने एक कलाकारले उनको स्वभावलाई सरल र इमानदार बताउँदै आरोपलाई गम्भीरतापूर्वक लिनुपर्ने धारणा व्यक्त गरेका छन्।
यता, आरोपबारे प्रतिक्रिया लिन खोज्दा सागर लम्सालसँग सम्पर्क हुन सकेको छैन।
