काठमाडौं, १५ वैशाख । नेपाली कांग्रेस संसदीय दलका नव-निर्वाचित नेता भीष्मराज आङ्देम्बेले निवर्तमान कार्यवाहक सभापति पूर्णबहादुर खड्कासँग शिष्टाचार भेट गरेका छन्। सर्वसम्मत रूपमा दलको नेतामा चयन भएसँगै आङ्देम्बे खड्काको गल्फुटारस्थित निवासमा पुगेर भेटवार्ता गरेका हुन्।
खड्कानिकट स्रोतका अनुसार, दुई नेताबीच सोमबार साँझ ५ बजेपछि भेट भएको थियो। यद्यपि, खड्काले उक्त भेटको तस्बिर मंगलबार मात्र सामाजिक सञ्जाल ‘एक्स’ मार्फत सार्वजनिक गरेका छन्।
सामाजिक सञ्जालमा तस्बिर साझेदारी गर्दै खड्काले आङ्देम्बेलाई संसदीय दलको नेतामा सर्वसम्मत चयन भएकोमा बधाई दिँदै सफल कार्यकालको शुभकामना व्यक्त गरेका छन्। उनले आङ्देम्बेको नेतृत्वमा संसद्मा कांग्रेसको भूमिका अझ सशक्त बन्ने विश्वास व्यक्त गरेका छन्।
यसपटक संसद्मा कांग्रेस दोस्रो ठूलो दलका रूपमा रहेको सन्दर्भमा, आङ्देम्बेले प्रमुख प्रतिपक्षी नेताको हैसियतमा महत्वपूर्ण र ऐतिहासिक भूमिका निर्वाह गर्ने खड्काको धारणा छ। साथै, संवैधानिक परिषद्को सदस्यका रूपमा पनि उनको भूमिका प्रभावकारी हुने अपेक्षा गरिएको छ।
उल्लेखनीय छ, आङ्देम्बे सोमबार सर्वसम्मत रूपमा कांग्रेस संसदीय दलको नेतामा चयन भएका थिए।
