बैतडी । जिल्ला प्रहरी कार्यालय बैतडीले जेनजी आन्दोलनका क्रममा काठमाडौंस्थित नख्खु कारागारबाट फरार भएका एक कैदीलाई पक्राउ गरेको छ ।
पक्राउ पर्नेमा बैतडीको पुर्चौंडी नगरपालिका–७ काफलीका नरेन्द्र सिंह रतोकी रहेका छन् । जिल्ला प्रहरी कार्यालय बैतडीका प्रवक्ता प्रहरी निरीक्षक बलदेव बडूका अनुसार उनलाई शुक्रबार बिहान घरबाटै नियन्त्रणमा लिइएको हो ।
इलाका प्रहरी कार्यालय पाटनका इन्चार्ज प्रहरी निरीक्षक इन्द्रराज भट्टको नेतृत्वमा खटिएको टोलीले बिहान करिब ४:३० बजे रतोकीलाई पक्राउ गरेको जनाएको छ ।
रतोकी गत भदौ २३ र २४ गते भएको जेनजी आन्दोलनका क्रममा नख्खु कारागारबाट फरार भएका थिए । उनीविरुद्ध जबरजस्ती करणी तथा डाँकाचोरी मुद्दामा १७ वर्ष ६ महिनाको कैद सजाय फैसला भएको प्रहरीले जनाएको छ ।
