काठमाडौं, २९ फागुन । अमेरिकी सेनाको एक केसी–१३५ रिफ्युलिङ ट्यांकर विमान पश्चिमी इराकको आकाशमा दुर्घटनाग्रस्त भएको छ। अमेरिकी सेनाले उक्त विमान ‘मित्र राष्ट्रको एयरस्पेस’ भित्र खसेको पुष्टि गरेको छ।
सैन्य अधिकारीहरूका अनुसार दुई वटा रिफ्युलिङ विमानमध्ये एउटा विमान भने सुरक्षित रूपमा अवतरण गर्न सफल भएको छ। यी प्रकारका ट्यांकर विमानहरूले लडाकु तथा बमवर्षक विमानहरूलाई उडानकै क्रममा हावामै इन्धन उपलब्ध गराउने काम गर्छन्।
अन्तर्राष्ट्रिय सञ्चारमाध्यमहरूका अनुसार दुर्घटनाको कारण अझै स्पष्ट हुन सकेको छैन। यद्यपि प्रारम्भिक रूपमा दुई विमान आकाशमै आपसमा ठोक्किएको हुन सक्ने अनुमान गरिएको छ।
अमेरिकी सेन्ट्रल कमान्डले भने यो घटना शत्रुपक्षको गोलीबारी वा आफ्नै सेनाको आक्रमणका कारण नभएको स्पष्ट पारेको छ। विमानमा कति जना सवार थिए र कुनै हताहती भएको छ वा छैन भन्नेबारे पनि हालसम्म औपचारिक जानकारी सार्वजनिक गरिएको छैन।
घटना इराकको आकाश क्षेत्रमा भएको पुष्टि भए पनि दुर्घटनास्थल छिमेकी देश इरानबाट कति दूरीमा पर्छ भन्ने विवरण खुलाइएको छैन।
सैन्य अभियानहरूमा रिफ्युलिङ ट्यांकर विमानहरूको महत्वपूर्ण भूमिका हुन्छ। यी विमानहरूले हावामै इन्धन भरेर लडाकु र बमवर्षक विमानहरूको उडान दूरी तथा युद्ध क्षमता बढाउने काम गर्छन्।
