अमेरिकाको ह्वाइट हाउसमा आयोजित पत्रकारहरूको रात्रिभोज कार्यक्रममा गोली चलेपछि सुरक्षा व्यवस्थामाथि प्रश्न उठेको छ। घटनापछि अमेरिकी राष्ट्रपति डोनाल्ड ट्रम्पले कार्यक्रमअघि कुनै सुरक्षा खतराबारे आफूलाई जानकारी नभएको बताएका छन्।
पत्रकारहरूसँग कुरा गर्दै उनले पूर्वसूचना नआएको स्पष्ट पारे। उनका अनुसार संदिग्ध व्यक्ति करिब ५० गज टाढाबाट दौडँदै आएको देखिएको थियो, जसपछि सुरक्षाकर्मीहरूले तुरुन्तै नियन्त्रणमा लिने प्रयास गरेका थिए। उनले संदिग्धलाई “अत्यन्त खतरनाक देखिने” व्यक्तिका रूपमा वर्णन गरेका छन्।
घटनामा संलग्न संदिग्धको पहिचान ३१ वर्षीय कोल टोमस एलेनका रूपमा गरिएको छ, जो क्यालिफोर्नियाका बासिन्दा हुन्। घटनापछि सुरक्षाकर्मीहरूले उनको बसोबास रहेको स्थानमा समेत छानबिन सुरु गरेका छन्।
हमलाको उद्देश्य अझै स्पष्ट भइसकेको छैन। ट्रम्पले उच्च प्रभाव पार्ने व्यक्तिहरूलाई लक्षित गर्दै राजनीतिक हिंसा हुन सक्ने धारणा व्यक्त गरेका छन्। उनले अमेरिकाका पूर्वराष्ट्रपति अब्राहम लिंकनको हत्या उदाहरणका रूपमा उल्लेख गरेका छन्।
पछिल्ला वर्षहरूमा आफूविरुद्ध दुई पटक ज्यानमार्ने प्रयास भइसकेको उल्लेख गर्दै ट्रम्पले यस्ता घटनालाई लिएर सधैं चिन्तित भएर बस्न नसकिने बताएका छन्। यसपटक भने सुरक्षा व्यवस्था अघिल्लो घटनाभन्दा कडा रहेको उनको दाबी छ।
प्रहरीले घटनाबारे थप अनुसन्धान जारी राखेको जनाएको छ।
