लगातारको वर्षाका कारण बाढीपहिरोको जोखिम बढेपछि सुदूरपश्चिमका बैतडी र दार्चुलामा यातायात सेवा बन्द गरिएको छ।
बैतडी जिल्ला प्रशासन कार्यालयले आज बिहान ६ बजेदेखि भोलि बिहान ६ बजेसम्म जिल्लाभर सार्वजनिक सवारीसाधन सञ्चालनमा रोक लगाएको हो।
मौसम पूर्वानुमान महाशाखा र राष्ट्रिय विपद् जोखिम न्यूनीकरण तथा व्यवस्थापन प्राधिकरणले बैतडी र दार्चुलामा भारी वर्षाको जोखिम रहेको भन्दै सतर्कता अपनाउन आग्रह गरेपछि दुवै जिल्लाका प्रशासनले सवारीसाधन सञ्चालनमा रोक लगाएका हुन्।
बैतडीमा गएरातिदेखि लगातार वर्षा भइरहेको छ। स्थानीय प्रशासनले लामो तथा छोटो दूरीका सबै सवारीसाधन नचलाउन यातायात व्यवसायी तथा सर्वसाधारणलाई आग्रह गरेको छ।
दार्चुला ‘अति जोखिम’ वर्गमा रहेकाले त्यहाँ पनि सवारीसाधन सञ्चालनमा रोक लगाइएको जिल्ला प्रशासन कार्यालयले जनाएको छ।
बाढीपहिरोको सम्भावित जोखिमलाई मध्यनजर गर्दै दुवै जिल्लाका स्थानीय प्रशासनले सर्वसाधारणलाई अनावश्यक यात्रा नगर्न तथा मौसमको अवस्था हेरेर मात्र आवागमन गर्न आग्रह गरेका छन्।
