अमेरिका लैजाने प्रलोभन देखाएर एक युवतीलाई विभिन्न देशमा घुमाइ बन्धक बनाउने, यौन शोषण गर्ने तथा डेढ करोड रुपैयाँभन्दा बढी ठगी गरेको आरोपमा स्याङ्जाका एक वडाध्यक्ष पक्राउ परेका छन् ।
मानव बेचबिखन अनुसन्धान ब्यूरोले पुतलीबजार नगरपालिका–४ का वडाध्यक्ष ४४ वर्षीय शिवबहादुर थापालाई पोखराबाट पक्राउ गरेको जनाएको छ ।
प्रहरीका अनुसार थापाले सामाजिक सञ्जाल ह्वाट्सएपमार्फत पीडित युवतीसँग सम्पर्क बढाई ६० लाख रुपैयाँमा अमेरिका पठाइदिने आश्वासन दिएका थिए । त्यसपछि २०७८ वैशाख ११ गते युवतीलाई काठमाडौँबाट दुबई लगिएको थियो ।
दुबईमा एक महिनासम्म होटलमा राखेर भिसा प्रक्रियाको बहानामा एजेन्टमार्फत युवतीको पासपोर्ट, फोटो र ८ लाख रुपैयाँ बराबरको विदेशी मुद्रा संकलन गरिएको प्रहरीको भनाइ छ । त्यसपछि युवतीलाई बहराइन, टर्की, ब्राजिल, पेरु हुँदै कोलम्बिया पुर्याइएको थियो ।
अनुसन्धानका क्रममा कोलम्बियामा युवतीलाई करिब एक वर्षसम्म बन्धक बनाएर राखिएको, शारीरिक तथा मानसिक यातना दिइएको र जबरजस्ती करणी समेत गरिएको खुलेको ब्यूरोले जनाएको छ ।
नेपाल फर्किन अनुरोध गर्दा समेत थप रकम मागिएको र ज्यान जोगाउन पीडितले अमेरिकामा रहेका साथीमार्फत विभिन्न बैंक खाता तथा वेस्टर्न युनियनमार्फत पटक–पटक गरी ९८ हजार ९०० अमेरिकी डलर पठाएको खुलेको छ ।
रकम लिएपछि एजेन्टमार्फत युवतीलाई कोलम्बियाबाट पानामाको जंगल हुँदै मेक्सिको सीमासम्म पुर्याइएको थियो । त्यहाँ पुगेपछि पुनः २० हजार डलर माग गरिएको र रकम उपलब्ध गराउन नसक्दा युवतीलाई मेक्सिकोमै अलपत्र छाडिएको प्रहरीले जनाएको छ ।
पछि अमेरिकामा रहेका आफन्त र अमेरिकास्थित नेपाली राजदूतावासको सहयोगमा ट्राभल डकुमेन्ट बनाएर पीडित २०८३ वैशाख २ गते नेपाल फर्किएकी थिइन् । नेपाल फर्किएपछि दिएको उजुरीका आधारमा प्रहरीले वैशाख २८ गते पोखराबाट थापालाई पक्राउ गरेको हो ।
प्रहरीले काठमाडौँ जिल्ला अदालतबाट म्याद थप गरी थापामाथि मानव बेचबिखन तथा ओसारपसार मुद्दामा थप अनुसन्धान अघि बढाएको जनाएको छ ।
