लगातार ओरालो लाग्दै सुनचाँदीको भाउ, तीन दिनमै सुन ७,८०० रुपैयाँले सस्तो

काठमाडौं, १७ वैशाख । नेपाली बजारमा सुनचाँदीको मूल्य घट्ने क्रम बिहीबार पनि जारी रह्यो। नेपाल सुनचाँदी व्यवसायी महासंघका अनुसार आज सुनको भाउ प्रतितोला १ हजार ८ सय रुपैयाँले घटेर २ लाख ९२ हजार ७ सय रुपैयाँमा कायम गरिएको छ।

यसअघि बुधबार सुन ३ हजार रुपैयाँले घटेको थियो भने मंगलबार पनि सोही दरले मूल्य घटेको थियो। यसरी पछिल्ला तीन दिनमै सुनको मूल्य कुल ७ हजार ८ सय रुपैयाँले ओरालो लागेको छ।

त्यसैगरी, चाँदीको भाउ पनि घटेको छ। आज चाँदी प्रतितोला १०५ रुपैयाँले सस्तो भई ४ हजार ८१० रुपैयाँमा झरेको छ। अघिल्लो दिन चाँदी ४ हजार ९१५ रुपैयाँमा कारोबार भएको थियो भने गत बिहीबार यसको मूल्य ५ हजार २० रुपैयाँ प्रतितोला रहेको थियो।

लगातारको मूल्य गिरावटले बजारमा सुनचाँदी किन्ने उपभोक्ताहरूका लागि केही राहत मिलेको देखिन्छ।