हेटौँडा - बागमती प्रदेश सरकारले उपसचिवसहित १८ जना कर्मचारीको सरुवा गरेको छ। आर्थिक वर्षको अन्त्यतिर गरिएको यस निर्णयअन्तर्गत विभिन्न मन्त्रालय, निर्देशनालय तथा मातहतका कार्यालयहरूमा कार्यरत कर्मचारीहरूको जिम्मेवारी फेरबदल गरिएको हो।
प्रमुख सचिव बाबुराम अधिकारीको निर्णयअनुसार मुख्यमन्त्री तथा मन्त्रिपरिषद्को कार्यालय, हेटौँडाले नवौँ तह (उपसचिव)देखि पाँचौँ तहसम्मका कर्मचारीहरूको सरुवा गरेको जनाएको छ।
सरुवा हुनेमध्ये ३ जना उपसचिव, ८औँ तहका ४ जना, ७औँ तहका १ जना, ६औँ तहका ९ जना र ५औँ तहका १ जना कर्मचारी रहेका छन्।
उपसचिव प्रतिभा पन्थीलाई प्रदेश नीति तथा योजना आयोगबाट प्रदेश सुशासन केन्द्र, जावलाखेलमा खटाइएको छ भने अनिता तामाङलाई सुशासन केन्द्रबाट सहकारी तथा गरिबी निवारण मन्त्रालय, हेटौँडामा सरुवा गरिएको छ। त्यस्तै, प्रदीपराज पौडेललाई सहकारी मन्त्रालयबाट प्रदेश सरकारी रजिस्ट्रारको कार्यालय, काठमाडौं पठाइएको छ।
यसैगरी अन्य अधिकृत तथा सहायक स्तरका कर्मचारीहरूलाई पनि विभिन्न मन्त्रालय तथा कार्यालयहरूमा जिम्मेवारी परिवर्तन गर्दै पुनःव्यवस्थित गरिएको प्रदेश सरकारले जनाएको छ।
