ब्रोड पीकमा हिमपहिरो, निम्स दाइसहित ६ नेपाली पर्वतारोही बेपत्ता

ठमाडौं, १५ साउन — पाकिस्तानको काराकोरम हिमशृङ्खलास्थित ब्रोड पीक आरोहणका क्रममा आएको हिमपहिरोमा विश्वविख्यात नेपाली पर्वतारोही निर्मल पुर्जा (निम्स दाइ)सहित ६ जना नेपाली पर्वतारोही बेपत्ता भएका छन्।

संस्कृति, पर्यटन तथा नागरिक उड्डयन मन्त्रालयअन्तर्गतको पर्यटन विभागले शुक्रबार विज्ञप्ति जारी गर्दै साउन १४ गते आएको हिमपहिरोपछि नेपालीसहित विभिन्न देशका पर्वतारोहीसँग सम्पर्क विच्छेद भएको जनाएको छ।

विभागका अनुसार बेपत्ता हुने नेपाली पर्वतारोहीमा निर्मल पुर्जा (निम्स दाइ), पुरबहादुर गुरुङ ‘युक्ता’, किली पेम्बा शेर्पा ‘किलु’, निमा शेर्पा, नवाङ थिन्दु शेर्पा र ग्यालु शेर्पा रहेका छन्।

पर्यटन विभागले बेपत्ता पर्वतारोहीहरूको खोज तथा उद्धार कार्य शीघ्र अघि बढाउन सम्बन्धित सबै निकायसँग आवश्यक समन्वय भइरहेको जनाएको छ। साथै, पाकिस्तानस्थित नेपाली दूतावासमार्फत पाकिस्तान सरकारसँग निरन्तर समन्वय गरी उद्धार प्रयासलाई तीव्र बनाइएको विभागले उल्लेख गरेको छ।

विभागले बेपत्ता पर्वतारोहीहरूको सुरक्षित उद्धारका लागि सम्बन्धित सरोकारवाला निकायलाई आवश्यक पहल गर्न आग्रह गर्दै उद्धार अभियानको प्रगतिबारे निरन्तर जानकारी गराइने जनाएको छ।